၁။ လုပ်ငန်းတာဝန်များမှာ အောက်ပါအတိုင်း ဖြစ်ပါသည်-
(က) မြန်မာနိုင်ငံရဲတပ်ဖွဲ့ဝင် တစ်ဦးချင်းစီတွင် ရှိသင့်ရှိအပ်သော အခြေခံအရည်အချင်း များကို လေ့ကျင့်သင်ကြားပေးသည့်အပြင် တပ်ဖွဲ့ဝင်တစ်ဦးဖြစ်သည့် အချိန်မှစ၍ မိမိလုပ်ငန်းတာဝန်များကို ကျွမ်းကျင်တတ်မြောက်စေရန် အစဉ်မပြတ် ကြိုးစား လေ့ကျင့်လိုသော စိတ်ဓာတ်ကိန်းအောင်းသွားအောင် လေ့ကျင့်ပေးခြင်း။
( ခ ) မြန်မာနိုင်ငံရဲတပ်ဖွဲ့လုပ်ငန်း လူမှုရေးနှင့် အထွေထွေဗဟုသုတတို့အတွက် ဘက်စုံ တတ်ကျွမ်းနားလည်သော တွေးခေါ်မြော်မြင်တတ်မှုတွင် အမြင်ကျယ်၍ ဘက်ပေါင်းစုံမှ ကျွမ်းကျင်သည့် တပ်ဖွဲ့ဝင်တစ်ဦး ဖြစ်လာစေရေးအတွက် လေ့ကျင့်ပေးခြင်း။
( ဂ ) ကိုယ်ကျင့်တရားကောင်းမွန်၍ မိမိကိုယ်မိမိ ထိန်းသိမ်းနိုင်သော၊ တာဝန်သိစိတ်ရှိသော နိုင်ငံတော်နှင့် မြန်မာနိုင်ငံရဲတပ်ဖွဲ့ ကိုယ်စားပြုနိုင်သည့် အရည်အချင်းပြည့်စုံသော၊ သစ္စာ၊ သမာဓိ၊ သတ္တိနှင့်ပြည့်စုံသော၊ မိမိတိုင်းပြည်နှင့် လူမျိုးအပေါ်တွင် ချစ်ခင်မှု အပြည့်အဝရှိသည့် တပ်ဖွဲ့ဝင်တစ်ဦးဖြစ်လာစေရန် ပြုစုပျိုးထောင်ပေးခြင်း။
(ဃ) ပြည်သူကိုကာကွယ်စောင့်ရှောက်ပြီး ပြည်သူကို အလုပ်အကျွေးပြုမည့် စိတ်ဓာတ်ရှိသော တပ်ဖွဲ့ဝင်တစ်ဦးဖြစ်လာအောင် လေ့ကျင့်သင်ကြားပေးခြင်း။
( င ) မြန်မာနိုင်ငံရဲတပ်ဖွဲ့၏ ရည်မှန်းချက်တာဝန်များဖြစ်သော ပြည်တွင်းလုံခြုံရေးနှင့် ရပ်ရွာအေးချမ်းသာယာရေး၊ တရားဥပဒေစိုးမိုးရေး၊ မူးယစ်ဆေးဝါးအန္တရာယ်တားဆီး ကာကွယ်ရေး၊ ပြည်သူ့အကျိုးပြုလုပ်ငန်းများ ဆောင်ရွက်ရေးတို့ကို ကောင်းမွန်စွာ ထမ်းဆောင်နိုင်ပြီး အရေးကြုံပါက နိုင်ငံတော်၏ အရံအင်အားအဖြစ် ထမ်းဆောင် နိုင်သော တပ်ဖွဲ့ဝင်များဖြစ်လာစေရန်အတွက် လေ့ကျင့်ပျိုးထောင်ပေးခြင်း။
( စ ) စည်းကမ်းပြည့်ဝသော ဒီမိုကရေစီစနစ် ရှင်သန်ခိုင်မာအောင် တည်ဆောက်ရေးနှင့် ဖွဲ့စည်းပုံ အခြေခံဥပဒေနှင့်အညီ ခေတ်မီဖွံ့ဖြိုးတိုးတက်သော နိုင်ငံတော်တည်ဆောက် ရာတွင် မိမိကျရာ အခန်းကဏ္ဍမှ ထိရောက်စွာပါဝင်နိုင်သည့် အရည်အချင်းနှင့် ပြည့်စုံသော တပ်ဖွဲ့ဝင်တစ်ဦး ဖြစ်လာအောင် လေ့ကျင့်ပေးခြင်း။
(ဆ) ကိုယ်ခန္ဓာကို ကျန်းမာကြံ့ခိုင်သန်စွမ်းပြီး အများနှင့် စုပေါင်းဆောင်ရွက်တတ်သည့် စိတ်ဓာတ်ရှိသော တပ်ဖွဲ့ဝင်တစ်ဦးဖြစ်လာအောင် လေ့ကျင့်သင်ကြားပေးခြင်း။
၂။ လေ့ကျင့်ရေးဆိုင်ရာမူဝါဒများမှာ အောက်ပါအတိုင်း ဖြစ်ပါသည်-
(က) တစ်ဦးချင်းတတ်ကျွမ်းရမည့် ဘာသာရပ်များ ကျွမ်းကျင်တတ်မြောက်စေရန်။
( ခ ) စိတ်ဓာတ်စည်းကမ်း၊ အကျင့်စာရိတ္တမြင့်မားသော တပ်ဖွဲ့ဝင်ကောင်းများ ဖြစ်လာစေရန်။
( ဂ ) စိတ်ပိုင်း၊ ရုပ်ပိုင်း ကြံ့ခိုင်သန်စွမ်းစေရန်။
(ဃ) တပ်ဖွဲ့စိတ်နှင့် တပ်တွင်းစည်းလုံးမှုရှိစေရန်။
( င ) တပ်ဖွဲ့၊ နိုင်ငံ၊ လူမျိုးအပေါ် သစ္စာစောင့်သိတတ်သော တပ်ဖွဲ့ဝင်များ ဖြစ်လာစေရန်။
( စ ) တပ်ဖွဲ့လုပ်ငန်း ကျွမ်းကျင်ပြီး အရည်အချင်းပြည့်ဝသည့် တပ်ဖွဲ့ဝင်များဖြစ်လာစေရန်။
(ဆ) ရဲတပ်ဖွဲ့အတွင်း လျော့နည်းနေသော အခြားအဆင့်အင်အားများ ပြန်လည်ဖြည့်ဆည်း ပေးနိုင်ရန်။
၃။ အောက်ပါသင်တန်းများ ဖွင့်လှစ် သင်ကြားလေ့ကျင့်ပေးလျက်ရှိပါသည်-
သင်တန်းအမျိုးအစား သင်တန်းကာလ
(က) ရဲအကြပ်ငယ်(အမျိုးသမီး)သင်တန်း ၈ ပတ်
( ခ ) ရဲအကြပ်လောင်း(အမျိုးသမီး)သင်တန်း ၈ ပတ်
( ဂ ) ရဲတပ်ကြပ်ကြီး(အမျိုးသမီး)သင်တန်း ၈ ပတ်
(ဃ) အခြေခံရဲတပ်သားသစ်(အမျိုးသမီး)သင်တန်း ၂၄ ပတ်