လှိုင်မြို့နယ်၊ အင်းစိန်လမ်းဆုံ မီးပွိုင့်တွင် ယာဉ်မဆင်မခြင်မောင်းနှင်မှုကြောင့် ယာဉ်(၆)စီးဆင့်တိုက်မှုဖြစ်ပွား

လှိုင်မြို့နယ်၊ အင်းစိန်လမ်းဆုံ မီးပွိုင့်တွင် ယာဉ်မဆင်မခြင်မောင်းနှင်မှုကြောင့် ယာဉ်(၆)စီးဆင့်တိုက်မှုဖြစ်ပွား

နေပြည်တော်၊ ဇွန် ၁၂

          ရန်ကုန်တိုင်းဒေသကြီး၊ လှိုင်မြို့နယ်၊ အင်းစိန်လမ်းဆုံမီးပွိုင့်တွင် ဇွန်လ ၁၀ ရက်နေ့က ယာဉ်မဆင်မခြင်မောင်းနှင်မှုကြောင့် ယာဉ်(၆)စီးဆင့်တိုက်မှုဖြစ်ပွားခဲ့ကြောင်း သိရသည်။

          ဖြစ်စဉ်မှာ ဇွန်လ ၁၀ ရက်နေ့ မွန်းလွဲ ၂ နာရီ ၅၀ မိနစ်အချိန်တွင် လှိုင်မြို့နယ်၊ အင်းစိန် လမ်းဆုံမီးပွိုင့်၌ ယာဉ်တိုက်မှုဖြစ်ပွားကြောင်း သတင်းအရ အမှတ်(၇)ယာဉ်ထိန်းရဲဒုတပ်ဖွဲ့ခွဲမှ တပ်ဖွဲ့ဝင်များက သွားရောက်စစ်ဆေးခဲ့ရာ လှိုင်မြို့နယ်၊ ပါရမီလမ်းအတိုင်း အရှေ့မှ အနောက်သို့ စမ်းချောင်းမြို့နယ်နေ အောင်မင်းထွန်း(၃၄)နှစ် မောင်းနှင်လာသော YGN-12 2J-xxxx HINO XZU420 မော်တော်ယာဉ်သည် ပါရမီလမ်းနှင့် အင်းစိန်လမ်းဆုံမီးပွိုင့်အနီးအရောက် အရှိန် မထိန်းနိုင်ဘဲ လမ်းလယ်မီးတိုင်အား ဝင်ရောက်တိုက်မိကာ ဆက်လက်၍ မီးပွိုင့်မီးနီ၍ ရပ်စောင့် နေသော ဒဂုံတောင်မြို့နယ်နေ မတင်မေလွင်(၃၅)နှစ်မောင်းနှင်သည့် YGN-13 CC-xxxx TOYOTA COROLLA FIELDER မော်တော်ယာဉ်အား နောက်မှဝင်ရောက်တိုက်မိခဲ့ပြီး ၎င်းမှတဆင့် ၎င်းယာဉ်၏ ယာဘက်ဘေးရှိ လှိုင်မြို့နယ်နေ ဦးထွန်းရီ(၅၈)နှစ်မောင်းနှင်သည့် MDY-15 2T-xxxx GAC AION Y PLUS EV မော်တော်ယာဉ်နှင့် ၎င်းရှေ့ရှိ သာကေတမြို့နယ်နေ ကိုရန်နိုင်စိုး(၄၀)နှစ် မောင်းနှင်သည့် BGO-11 4L-xxxx SUZUKI CARRY မော်တော်ယာဉ်၊ ဒဂုံမြောက်မြို့နယ်နေ ကိုရဲခန့်(၂၆)နှစ် မောင်းနှင်သည့် MDY-14 5S-xxxx BYD SEAGULL EV မော်တော်ယာဉ်နှင့် မှော်ဘီမြို့နယ်နေ ကိုသက်ဆွေ(၃၈)နှစ်မောင်းနှင်သည့် MDY-13 9Q-xxxx HIGER မော်တော်ယာဉ်များအား အဆင့်ဆင့်ဝင်ရောက်တိုက်မိခဲ့ကြောင်း၊

          အဆိုပါယာဉ်တိုက်မှုကြောင့် လမ်းလယ်မီးတိုင်နှင့်မော်တော်ယာဉ်(၆)စီးမှာ အသီးသီး ပျက်စီး ဆုံးရှုံးခဲ့သဖြင့် မော်တော်ယာဉ်အား မဆင်မခြင်ပေါ့လျော့စွာမောင်းနှင်သူ ယာဉ်မောင်း အောင်မင်းထွန်း အား လှိုင်မြို့မရဲစခန်း ယာဉ်(ပ)၄/၂၀၂၆၊ ရာဇသတ်ကြီးပုဒ်မ ၂၇၉ ဖြင့် အမှုဖွင့် အရေးယူထားကြောင်း သတင်းရရှိသည်။ 

(ရဲပြန်ကြား)